കോഴിക്കോട്: ലോക പരിസ്ഥിതി ദിനത്തോടനുബന്ധിച്ച് സീക്യു പ്രീസ്കൂൾ നെറ്റ്‌വർക്ക് നടത്തുന്ന പ്ലാന്റ് ദി പ്ലാനറ്റ് പദ്ധതി കേരള പരിസ്ഥിതി വനം വകുപ്പ് മന്ത്രി എ കെ ശശീന്ദ്രൻ ഉദ്ഘാടനം ചെയ്തു. 15,000 വൃക്ഷത്തൈകൾ നട്ട് മൂന്നുവർഷം പരിപാലിക്കുന്ന പദ്ധതിയിൽ  ഇന്ത്യയിലേയും മൂന്ന് വിദേശരാജ്യങ്ങളിലേയും 152 സ്കൂളുകളിലെ വിദ്യാർഥികൾ  ഭാഗമാകും. വൃക്ഷത്തൈക്ക് പേരു നൽകി  ചെടിയുടെ വളർച്ച ഘട്ടങ്ങളെ നിരീക്ഷിച്ചും സംരക്ഷിച്ചും പോറ്റി വളർത്തുന്നതാണ് പദ്ധതി. ഓരോ വിദ്യാർഥിയുടെയും വൃക്ഷങ്ങൾ പഠന പ്രവർത്തനങ്ങളുടെ ഭാഗമാവുന്നത് വഴി പഠനകാലത്തുടനീളം ഇത് സംരക്ഷിക്കപ്പെടുന്നു എന്ന് ഉറപ്പുവരുത്താനാവും. പദ്ധതിയുടെ സോണൽ ഉദ്ഘാടനങ്ങൾ കർണാടകയിൽ സ്പീക്കർ യു ടി ഖാദറും ലക്ഷദ്വീപിൽ അഗ്രികൾച്ചർ അഡ്മിനിസ്ട്രേഷൻ വകുപ്പ് ഡയറക്ടർ ബുസർ ജംഹറും നിർവഹിക്കും. വിവിധ സ്കൂളുകളിൽ രാഷ്ട്രീയ സാമൂഹിക മേഖലകളിലെ പ്രമുഖർ പദ്ധതിയുടെ ഭാഗമാകും.