കോഴിക്കോട്: മർകസ് സംഘടിപ്പിക്കുന്ന അന്താരാഷ്ട്ര മീലാദ് സമ്മേളനം സെപ്റ്റംബർ 13 ശനിയാഴ്ച കോഴിക്കോട് നടക്കും. വിവിധ രാജ്യങ്ങളിലെ പണ്ഡിതരും മുഫ്തിമാരും യൂണിവേഴ്‌സിറ്റി തലവന്മാരും നയതന്ത്ര പ്രതിനിധികളും സമസ്ത നേതാക്കളും സമ്മേളനത്തിൽ പങ്കെടുക്കും. ആഗസ്റ്റ് 25 ന് മർകസ് നോളേജ് സിറ്റിയിലെ ജാമിഉൽ ഫുതൂഹിൽ നടക്കുന്ന അൽ മൗലിദുൽ അക്ബർ സംഗമത്തോടെ ആരംഭിക്കുന്ന റബീഉൽ അവ്വൽ ക്യാമ്പയിന്റെ സമാപനമായാണ് കോഴിക്കോട് മീലാദ് സമ്മേളനം നടക്കുക. പ്രവാചകൻ മുഹമ്മദ് നബിയെ കുറിച്ച് കൂടുതൽ അറിയാനും വിവിധ ദേശങ്ങളിലെ പ്രവാചക പ്രകീർത്തന വൈവിധ്യം ആസ്വദിക്കാനുമുള്ള വേദിയാകും സമ്മേളനം. ഇന്ത്യൻ ഗ്രാൻഡ് മുഫ്‌തി കാന്തപുരം എ പി അബൂബക്കർ മുസ്‌ലിയാരുടെ വാർഷിക മദ്ഹുർറസൂൽ പ്രഭാഷണം സമ്മേളനത്തിന്റെ പ്രധാന ആകർഷണമാകും. തിരുനബി ദർശനങ്ങളും മൊഴികളും കൂടുതൽ പ്രസക്തിയാർജിക്കുന്ന സമകാലികാന്തരീക്ഷത്തിൽ അവ കൂടുതൽ ജനങ്ങളിലേക്കും ഇടങ്ങളിലേക്കും പ്രസരിപ്പിക്കുകയാണ് സമ്മേളനത്തിന്റ ദൗത്യം. 

അന്താരാഷ്‌ട്ര പ്രകീർത്തന സംഘങ്ങളുടെ മൗലിദ് സദസ്സ്, വിദ്യാഭ്യാസ വിചക്ഷണരുടെ സംഗമം, സൂഫി സരണിയുടെ സൗന്ദര്യം അവതരിപ്പിക്കുന്ന സെമിനാർ, പൗര പ്രമുഖരുടെയും പണ്ഡിതരുടെയും സംഗമം തുടങ്ങി വിവിധ പരിപാടികളാണ് സമ്മേളന ദിവസം നടക്കുക. മലപ്പുറം, കോഴിക്കോട്, വയനാട്, കണ്ണൂർ ജില്ലകളിലെ മദ്റസകളിലെ ദഫ്, സ്‌കൗട്ട് സംഘങ്ങൾ അണിനിരക്കുന്ന മീലാദ് ഘോഷയാത്ര നഗരത്തെ വർണാഭമാക്കും.