കോഴിക്കോട്: മർകസ് തൊഴിലധിഷ്ഠിത വിദ്യാഭ്യാസ സ്ഥാപനമായ ഐ ടി ഐയിലെ 29-ാം ബാച്ചിന്റെ കോൺവൊക്കേഷൻ ഇന്ന്(ശനി) നടക്കും. രാവിലെ 10 ന് ഐ ടി ഐ ഓഡിറ്റോറിയത്തിൽ നടക്കുന്ന സനദ് ദാന ചടങ്ങുകൾ പിടിഎ റഹീം എം എൽ എ ഉദ്ഘാടനം ചെയ്യും. മർകസ് ഡയറക്ടർ ജനറൽ സി മുഹമ്മദ് ഫൈസി മുഖ്യപ്രഭാഷണം നടത്തും. ഐടിഐ പ്രിൻസിപ്പൽ എൻ മുഹമ്മദലി അധ്യക്ഷത വഹിക്കും.

കുന്ദമംഗലം ഗ്രാമപഞ്ചായത്ത് വൈസ്പ്രസിഡന്റ് വി അനിൽകുമാർ സർട്ടിഫിക്കറ്റുകൾ വിതരണം ചെയ്യും. വിവിധ ട്രേഡുകളിലെ റാങ്ക് ജേതാക്കൾക്ക് മുൻ അധ്യാപകൻ സുനീഷിന്റെ പേരിലുള്ള എൻഡോവ്മെന്റുകൾ നൽകും. മർകസ് ഡയറക്ടർ സി പി ഉബൈദുല്ല സഖാഫി,  പി മുഹമ്മദ് യൂസുഫ്, മുഹമ്മദലി സഖാഫി വള്ളിയാട്, അക്ബർ ബാദുഷ സഖാഫി, അബ്‌ദുറഹ്‌മാൻ കുട്ടി എന്നിവർ ആശംസകളർപ്പിക്കും. പി അശ്‌റഫ് സ്വാഗതവും സജീവ് കുമാർ നന്ദിയും പറയും.

പഠനം പൂർത്തിയാക്കിയ വിദ്യാർഥികൾക്കെല്ലാം തൊഴിൽ നൽകുന്ന സംസ്ഥാനത്തെ തന്നെ മുൻനിര ഐടിഐകളിലൊന്നാണ് മർകസിലേത്. നിലവിൽ 29 എൻ സി വി ടി  ബാച്ചുകളിലായി 3169 വിദ്യാർഥികളാണ് ഇവിടെനിന്നും പഠനം പൂർത്തിയാക്കി വിവിധ മേഖലകളിൽ സേവനമനുഷ്ഠിക്കുന്നത്.