എരഞ്ഞിപ്പാലം: കേരളപ്പിറവി ദിനാചരണത്തിന്റെ ഭാഗമായി എരഞ്ഞിപ്പാലം മർകസ് ഇന്റർനാഷണൽ സ്‌കൂളിൽ വിദ്യാർഥികളുടെ മാനസികാരോഗ്യവും ജീവിതസന്തോഷവും ഉറപ്പാക്കുന്ന ‘ഹാപ്പിനസ് പ്രോജക്റ്റിന്’ തുടക്കം കുറിച്ചു. വിദ്യാഭ്യാസത്തിന്റെ സുപ്രധാന ലക്ഷ്യങ്ങളിലൊന്നായ വിദ്യാർഥികളുടെ ക്ഷേമവും സമഗ്ര വളർച്ചയും ഉറപ്പാക്കുക എന്ന ലക്ഷ്യത്തോടെയാണ് ഈ പദ്ധതി ആസൂത്രണം ചെയ്തിരിക്കുന്നത്.

പഴയ ശിക്ഷാ രീതികൾ പൂർണമായും ഒഴിവാക്കി, പകരം സംഭാഷണം, കരുണ, സഹാനുഭൂതിപൂർണമായ മനസ്സിലാക്കൽ എന്നിവയെ അടിസ്ഥാനമാക്കി സ്കൂൾ കാമ്പസിനെ സന്തോഷകരമായ പഠനയിടമാക്കി മാറ്റാനാണ് പദ്ധതി ലക്ഷ്യമിടുന്നത്. അക്കാദമിക് നേട്ടങ്ങൾക്കപ്പുറം വിദ്യാഭ്യാസം മനഃശാന്തിയും ജീവിതബോധവും വളർത്തുന്ന പ്രക്രിയയായി മാറണം എന്ന തിരിച്ചറിവിലാണ് ഈ പ്രോജക്റ്റ് ആവിഷ്കരിച്ചത്.

ആധുനിക ജീവിതരീതികൾ സൃഷ്ടിക്കുന്ന മാനസിക സമ്മർദങ്ങൾക്കും സാമൂഹിക വെല്ലുവിളികൾക്കും മറുപടി കണ്ടെത്താനുള്ള മർകസ് ഇന്റർനാഷണൽ സ്‌കൂളിന്റെ ശ്രമമായാണ് ഇത് വിലയിരുത്തപ്പെടുന്നത്. സന്തോഷം, ജിജ്ഞാസ, കരുണ എന്നിവ കേന്ദ്രീകരിച്ച് വിദ്യാർഥികളെ ചിന്തിക്കുന്നവരും അനുഭവിക്കുന്നവരുമായ പഠിതാക്കളാക്കുക എന്ന മർകസിന്റെ 'തിങ്കിംഗ് സ്‌കൂൾ' എന്ന ആശയത്തെയാണ് ‘ഹാപ്പിനസ് പ്രോജക്റ്റ്’ പ്രതിഫലിക്കുന്നത്.

മർകസ് ഗ്രൂപ്പ് ഓഫ് സ്കൂൾസ് അസോസിയേറ്റ് ഡയറക്ടർ മുഹമ്മദ് ദിൽഷാദ് പദ്ധതിയുടെ ഔദ്യോഗിക ഉദ്ഘാടനം നിർവഹിച്ചു. സ്‌കൂൾ പ്രിൻസിപ്പൽ മുഹമ്മദ് ഹാഫിസ് അദനി ഹാപ്പിനസ് പ്രോജക്റ്റിന്റെ 15 പ്രതിജ്ഞകൾ അവതരിപ്പിച്ചു.

പദ്ധതിയുടെ ഭാഗമായി മോർണിംഗ് ജോയ് സർക്കിൾ, ക്യൂരിയോസിറ്റി കോർണർ, ഗ്രാറ്റിറ്റ്യൂഡ് വാൾ, ആർട്ട് ഫോർ ഹാപ്പിനസ് തുടങ്ങിയ വിവിധ പരിപാടികൾ നടപ്പിലാക്കും. കൂടാതെ, ഹാപ്പിനസ് ഇൻഡക്സ് അനുസരിച്ച് പ്രതിമാസം മികച്ച ക്ലാസ്സിന് ‘ഹൗസ് ഓഫ് ഹാപ്പിനസ് അവാർഡ്’ നൽകും. ഹാപ്പിനസ് വീക്ക്, ഹാപ്പിനസ് അംബാസിഡർ ബാഡ്ജ്, രക്ഷിതാക്കൾക്കായുള്ള ഹാപ്പിനസ് ഫ്രെയിം ഫോട്ടോ മത്സരം എന്നിവയും പദ്ധതിയുടെ ഭാഗമായി സംഘടിപ്പിക്കും.

ചടങ്ങിൽ സഅദുദീൻ സഖാഫി (അഡ്മിനിസ്ട്രേറ്റീവ് ഓഫീസർ) അധ്യക്ഷത വഹിച്ചു. നിസാർ പുതിയങ്ങാടി (പി.ടി.എ പ്രസിഡണ്ട്), അസാദ് സഖാഫി, അമീൻ സഖാഫി, ഗീതാ മനോജ്, ബിലാൽ തുടങ്ങിയവർ സംസാരിച്ചു.