സർഹിന്ദ്: സമസ്ത സെന്റിനറി ആഘോഷങ്ങളുടെയും മർകസ് 50-ാം വാർഷിക ദേശീയ പദ്ധതികളുടെയും ഭാഗമായി പഞ്ചാബിലെ സർഹിന്ദിൽ നിർമിച്ച മർകസ് ഇമാം റബ്ബാനി സെൻട്രൽ കാമ്പസിന്റെ ഔദ്യോഗിക ഉദ്ഘാടന  സമ്മേളനത്തിന് പ്രൗഢാരംഭം. പ്രശസ്ത ഇസ്ലാമിക പണ്ഡിതനായ ഇമാം റബ്ബാനി അഹ്മദ് ഫാറൂഖിയുടെ നാമധേയത്തിലുള്ള ഈ സ്ഥാപനം മർകസ് ദേശീയ വിദ്യാഭ്യാസ  മുന്നേറ്റത്തിൻ്റെ പുതിയ കേന്ദ്രമാകും.

ആധുനിക സൗകര്യങ്ങളോടുകൂടിയ വിശാലമായ കാമ്പസിൽ റെസിഡൻഷ്യൽ സൗകര്യത്തോടെയുള്ള വിദ്യാഭ്യാസ കേന്ദ്രവും ഗൈഡൻസ് സെന്ററും പബ്ലിക് ലൈബ്രറിയും യുവാക്കൾക്കും പെൺകുട്ടികൾക്കും പ്രത്യേകമായുള്ള സീസണൽ ട്രെയിനിംഗ് പ്രോഗ്രാമുകളുമാണ് ആദ്യഘട്ടത്തിലുണ്ടാവുക. മർകസിന്റെ നേതൃത്വത്തിൽ പഞ്ചാബിൽ പ്രവർത്തിക്കുന്ന ഐറിസ് ഫൗണ്ടേഷന് കീഴിൽ 25 വില്ലേജുകളിലായി നടന്ന് വരുന്ന അറുപതോളം സാംസ്കാരിക കേന്ദ്രങ്ങൾ, മൈക്രോ ലേണിംഗ് സെൻറുകൾ, ഹിഫ്ളുൽ ഖുർആൻ മദ്രസകൾ, സാമൂഹ്യക്ഷേമ പ്രവർത്തനങ്ങൾ എന്നിവയുടെ ആസ്ഥാനമായി മാറുന്ന കാമ്പസിൻ്റെ ഉദ്ഘാടന പരിപാടികൾ ഇന്നലെ രാവിലെ നടന്ന ഇമാം റബ്ബാനി ദർഗ സിയാറത്തോടെ ആരംഭിച്ചു. സർഹിന്ദ് ഖലീഫ സയ്യിദ് സ്വാദിഖ് റസാ പ്രാർഥനക്ക് നേതൃത്വം നൽകി. സയ്യിദ് ഫവാദ് സർഹിന്ദി, മൗലാന ഫാറൂഖ് ലുധിയാനവി, സൂഫി അസ്‌ലം ചിശ്തി തുടങ്ങിയ പ്രമുഖർ പങ്കെടുത്തു.

വൈകുന്നേരം നാലിന് നടന്ന പതാക ഉയർത്തലിന് പീർ സയ്യിദ് നൂറാനി ഷാ നേതൃത്വം നൽകി. മൗലാന മുതീഉറഹ്മാൻ, മൗലാന ശംസ് റസാ മർകസി തുടങ്ങിയവർ സംബന്ധിച്ചു. വൈകീട്ട് നടന്ന എസ് എസ് എഫ് പഞ്ചാബ് സ്റ്റേറ്റ്  'ഇൻസ്റ്റാളേഷൻ' കാമ്പ് നാഷണൽ സെക്രട്ടറി ദിൽഷാദ് അഹ്മദ് കാശ്മീർ ഉദ്ഘാടനം ചെയ്തു. ദേശീയ നേതാക്കളായ ശരീഫ് ബാംഗ്ലൂർ, ശാഫി നൂറാനി, സി പി സ്വാദിഖ് നൂറാനി, ശാഹിദ് നിസാമി  എന്നിവർ നേതൃത്വം നൽകി. 

ഇന്ന് രാവിലെ നടക്കുന്ന എജ്യു സമ്മിറ്റ്  ജാമിഅ മില്ലിയ്യ ഡിപാർട്മെൻ്റ് ഓഫ് കെമിസ്ട്രി പ്രൊഫസർ സൈഫ് ചൗദരി ഉദ്ഘാടനം ചെയ്യും. ഡോ. മുഹമ്മദ് റോഷൻ നൂറാനി കീനോട്ട് അഡ്രസും ശൗക്കത്ത് ബുഖാരി കാശ്മീർ, സുഹൈറുദ്ദീൻ നൂറാനി ബംഗാൾ, സിദ്ദീഖ് നൂറാനി മധ്യപ്രദേശ് തുടങ്ങിയവർ വ്യത്യസ്ത വിഷയങ്ങളിൽ പേപ്പറുകളും അവതരിപ്പിക്കും.

എം- ഹാൻഡ്സ് എൻ.ജി.ഒ സമ്മിറ്റിന് സി.പി സിറാജ് സഖാഫി, ഉബൈദ് നൂറാനി ഗുജറാത്ത്, ജലാൽ നൂറാനി, സയ്യിദ് മുഅമ്മിൽ ബാഹസൻ നൂറാനി തുടങ്ങിയവർ നേതൃത്വം നൽകും. രണ്ട് മണിക്ക് നടക്കുന്ന ഉലമാ സമ്മേളനം മർകസ് ഡയറക്ടർ ജനറൽ  സി മുഹമ്മദ് ഫൈസി ഉദ്ഘാടനം ചെയ്യും. ഡോ. മുഹമ്മദ് അബ്ദുൽ ഹകീം അസ്ഹരി മുഖ്യ പ്രഭാഷണം നടത്തും. രാജ്യത്തെ പ്രമുഖ ഇസ്‌ലാമിക പണ്ഡിതരായ മൗലാന സയ്യിദ് ഫരീദ് ഷാ കാശ്മീർ, മൗലാന മുഫ്തി അഹസനുൽ ഹുദ മിസ്ബാഹി ലുധിയാന, മൗലാന മുഹമ്മദ് ബഖാർ അലി നഈമി, മൗലാന മുഫ്തി അശ്ഫാഖുൽ ഖാദിരി, മൗലാന മുഫ്തി തസ്ലീം റസാ ഡൽഹി, മൗലാന റമളാൻ നഈമി ബതിൻഡ എന്നിവർ വിവിധ വിഷയങ്ങളിൽ സംസാരിക്കും. അഞ്ച് മണിക്ക് നടക്കുന്ന റബ്ബാനി ദസ്താർബന്ദിക്ക് സയ്യിദ് ത്വാഹാ സഖാഫി, സി മുഹമ്മദ് ഫൈസി, ഡോ മുഹമ്മദ് അബ്ദുൽ ഹകീം അസ്ഹരി തുടങ്ങിയവർ നേതൃത്വം നൽകും. ആസഫ് നൂറാനി, ഫാളിൽ നൂറാനി, ഉസാമ നൂറാനി തുടങ്ങിയവർ സംബന്ധിക്കും.

വൈകീട്ട് ഏഴിന് നടക്കുന്ന പൊതുസമ്മേളനം ഡോ. മുഹമ്മദ് അബ്ദുൽ ഹകീം അസ്ഹരി ഉദ്ഘാടനം ചെയ്യും. ഇന്ത്യൻ ഗ്രാൻ്റ് മുഫ്തി കാന്തപുരം എപി അബൂക്കർ മുസ്ലിയാർ സന്ദേശ പ്രഭാഷണം നടത്തും. സി മുഹമ്മദ് ഫൈസി അധ്യക്ഷത വഹിക്കും. ഇൻ്റർഫെയ്ത് ഡയലോഗിൽ ഫതേഹ്ഗഢ് സിക് ഗുരുദ്വാർ ഹെഡ് ഗ്രന്ഥി ഹർപൽ സിംഗ് സ്നേഹസന്ദേശം കൈമാറും. ഡൽഹി മുൻ കാമ്പിനറ്റ് മിനിസ്റ്റർ ഇംറാൻ ഹുസൈൻ, സിപത്തന എം എൽ എ രൂപീന്ദർ സിംഗ് ഹാബി, ഫതേഹ്ഗഢ് എം എൽ എ ലക്ബീർ സിംഗ് റായിജി തുടങ്ങിയവർ വിശിഷ്ടാതിഥികളാകും. സയ്യിദ് ത്വാഹ തങ്ങൾ സഖാഫി, പീർ സയ്യിദ് നിഅമതുള്ള ശാ ജീലാനി, മുഫ്തി അബ്ദുഹീം അക്ബരി, ഉമറലി സഖാഫി തുടങ്ങിയവർ പ്രഭാഷണം നടത്തും. മജീദ് കക്കാട്, അബൂ സ്വാലിഹ് സഖാഫി, സയ്യിദ് സുഹൈൽ നൂറാനി അവേലം, അബ്ദുറഷീദ് സഖാഫി തുടങ്ങിയവർ സംബന്ധിക്കും. ഫാളിൽ നൂറാനി സ്വാഗതവും അൻസാർ റബ്ബാനി നന്ദിയും പറയും.