കോഴിക്കോട്: മര്‍കസ് പുറത്തിറക്കുന്ന സമഗ്രമായ മാല, മൗലിദ്, റാത്തീബ്, ഔറാദുകളുടെ സമാഹാരത്തിന്റെ കവര്‍ പ്രകാശനം ഇന്ത്യന്‍ ഗ്രാന്‍ഡ് മുഫ്തി കാന്തപുരം എ പി അബൂബക്കര്‍ മുസ്ലിയാര്‍ നിര്‍വഹിച്ചു. ആത്മീയ സദസ്സുകളിലും വീടുകളിലും നിത്യോപയോഗത്തിന് ഉതകുന്ന രീതിയിലാണ് ഈ സമാഹാരം മര്‍കസ് തയ്യാറാക്കിയിരിക്കുന്നത്. കാന്തപുരം ഉസ്താദ് രചിച്ച മൗലിദുകള്‍ക്ക് പുറമെ, പ്രവാചക പ്രകീര്‍ത്തന കാവ്യങ്ങളായ ശറഫുല്‍ അനാം, മന്‍ഖൂസ് മൗലിദ്, ബദ്ർ മൗലിദ്, മഹ്ളറതുല്‍ ബദ്‌രിയ്യ എന്നിവയും ഇതില്‍ ഉള്‍ക്കൊള്ളിച്ചിട്ടുണ്ട്. കൂടാതെ, കേരളീയ മുസ്ലിംകള്‍ക്കിടയില്‍ ഏറെ പ്രചാരമുള്ള മുഹ്‌യിദ്ദീൻ മാല, രിഫാഈ മാല, അജ്മീര്‍ മൗലിദ്, മടവൂര്‍ മൗലിദ് അടക്കമുള്ള നിരവധി മാല - മൗലിദുകളും റാത്തീബുകളും ഔറാദുകളും ഈ ഒറ്റ പുസ്തകത്തില്‍ ലഭ്യമാക്കിയിട്ടുണ്ട്.

മികച്ച ഗുണനിലവാരത്തോടെ 450ലധികം പേജുകളിലാണ് ഈ ഗ്രന്ഥം പ്രസാധനം ചെയ്യുന്നത്. 400 രൂപയാണ് പുസ്തകത്തിന്റെ ഓഫര്‍ നിരക്ക്. ഗ്രന്ഥത്തിന്റെ പ്രീ - പബ്ലിക്കേഷന്‍ ബുക്കിംഗ് ഇതിനകം ആരംഭിച്ചിട്ടുണ്ട്. കൂടുതല്‍ വിവരങ്ങള്‍ക്കും പുസ്തകം മുന്‍കൂട്ടി ബുക്ക് ചെയ്യുന്നതിനും മലൈബാര്‍ പ്രസ്സിന്റെ ഓണ്‍ലൈന്‍ സ്റ്റോറായ store.malaibar.org വഴിയും +91 7034 022 055 എന്ന നമ്പറിലും ബന്ധപ്പെടാവുന്നതാണ് എന്ന് പ്രസാധകര്‍ അറിയിച്ചു.

മര്‍കസില്‍ നടന്ന പ്രകാശന ചടങ്ങില്‍ സയ്യിദ് അലി ബാഫഖി, സയ്യിദ് ശഫറുദ്ധീന്‍ ജമലുല്ലൈലി, സി മുഹമ്മദ് ഫൈസി, സയ്യിദ് ശിഹാബുദ്ദീന്‍ അഹ്ദല്‍ മുത്തനൂര്‍, വി.പി.എം ഫൈസി വില്യാപള്ളി തുടങ്ങിയവര്‍ പങ്കെടുത്തു.