കോഴിക്കോട്: വിശുദ്ധ ഖുർആൻ വിളംബരം ചെയ്യുന്നത് മാനവികതയുടെ മഹിത സന്ദേശമാണെന്നും അതനുസരിച്ച് ജീവിക്കുന്നവർക്ക് ആരെയും ദ്രോഹിക്കാനാവില്ലെന്നും മർകസ് ഡയറക്ടർ ജനറൽ സി മുഹമ്മദ് ഫൈസി. ഖുർആൻ പ്രമേയമായി നടക്കുന്ന കേരളത്തിലെ ഏറ്റവും വലിയ വൈജ്ഞാനിക മത്സരമായ മർകസ് ഖുർആൻ ഫെസ്റ്റ്(എം.ക്വു.എഫ്) രണ്ടാം എഡിഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മർകസ് അക്കാദമി ഓഫ് ഖുർആൻ സ്റ്റഡീസിന്റെ ആഭിമുഖ്യത്തിൽ സംഘടിപ്പിക്കുന്ന ഫെസ്റ്റിന്റെ ഫൈനൽ മത്സരങ്ങൾക്കാണ് കാരന്തൂരിലെ മർകസ് കൺവെൻഷൻ സെന്ററിൽ വൈകുന്നേരം അഞ്ചിന് തുടക്കമായത്.

മൂന്നുദിവസം നീണ്ടുനിൽക്കുന്ന ഫെസ്റ്റിൽ കേരളത്തിലെ വിവിധ ജില്ലകളിലെ 29 ക്യാമ്പസുകളിലെ 800 വിദ്യാർഥികൾ മാറ്റുരക്കും. ഖുർആൻ പ്രമേയമായ 28 വ്യത്യസ്ത മത്സരങ്ങളാണ് ഫെസ്റ്റിന്റെ മുഖ്യ ആകർഷകം. ഖുർആൻ പാരായണത്തിലും മനഃപാഠത്തിലും പരിശീലിപ്പിക്കുകയും അന്താരാഷ്ട്ര ഹോളി ഖുർആൻ അവാർഡ് മത്സരങ്ങളിലേക്ക് വിദ്യാർഥികളെ പ്രാപ്തരാക്കുകയും ചെയ്യുകയെന്നതാണ് ഫെസ്റ്റിന്റെ ലക്ഷ്യം. വിശുദ്ധ ഖുർആന്റെ മാനവിക സന്ദേശം, ബഹുസ്വരത, ശാസ്ത്രീയ വീക്ഷണം എന്നിവ വിളംബരം ചെയ്യുന്ന വിവിധ സെഷനുകളും ഫെസ്റ്റിൽ നടക്കും. നാല് സെക്ടറുകളിലായി ഒരുമാസത്തോളം നീണ്ടുനിന്ന സെക്ടർ തല മത്സരങ്ങളിൽ മികവ് പുലർത്തിയ വിദ്യാർഥികളാണ് സെൻട്രൽ ഫെസ്റ്റിൽ മത്സരിക്കുക. ഖുർആൻ വിജ്ഞാനശാഖയിൽ പാണ്ഡിത്യമുള്ള പ്രഗത്ഭർ ഫെസ്റ്റിന്റെ വിവിധ സെഷനുകളിൽ സംസാരിക്കും. വിദേശ ഖുർആൻ പണ്ഡിതരായ ഖാരിഅ് ശൈഖ് ഫൗസി സഈദ് ഹൈകൽ ഈജിപ്ത്, ഖാരിഅ് ശൈഖ് ത്വാരിഖ് അബ്ദുൽ ഹാദി ഒമാൻ, ഹബീബ് മഹ്ദി അബൂബക്കർ അൽ ഹാമിദ് മലേഷ്യ തുടങ്ങിയവർ പങ്കെടുക്കും. ഫെസ്റ്റിന്റെ ഭാഗമായി പൊതുജനങ്ങൾക്കും കുടുംബങ്ങൾക്കും വേണ്ടി മെഗാ ക്വിസ് അടക്കമുള്ള വിവിധ പരിപാടികൾ സംഘടിപ്പിച്ചിട്ടുണ്ട്. ഞായറാഴ്ച്ച വൈകുന്നേരം നടക്കുന്ന സമാപന സംഗമം ഉദ്ഘാടനവും അവാർഡ് ദാനവും ഇന്ത്യൻ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാർ നിർവഹിക്കും.

ഉദ്ഘാടന ചടങ്ങിൽ മർകസ് ഖുർആൻ അക്കാദമി പ്രിൻസിപ്പൽ അബൂബക്കർ സഖാഫി പന്നൂർ അധ്യക്ഷത വഹിച്ചു. മർകസ് ഡയറക്ടർ സി പി ഉബൈദുല്ല സഖാഫി മുഖ്യപ്രഭാഷണം നടത്തി. വി എം റശീദ് സഖാഫി, അഡ്വ. മുഹമ്മദ് ശരീഫ്, ഹനീഫ് സഖാഫി, ശമീം കെ കെ, അക്ബർ ബാദുഷ സഖാഫി, മഹ്‌മൂദ്‌ കോരോത്ത്, മുഹമ്മദ് ഹനീഫ് സഖാഫി ആനമങ്ങാട് സംബന്ധിച്ചു. അബ്ദുസമദ് സഖാഫി മൂർക്കനാട് സ്വാഗതവും അബ്ദുന്നാസർ സഖാഫി പന്നൂർ നന്ദിയും പറഞ്ഞു.