കാരന്തൂർ: മർകസ് കോളേജ് ഓഫ് ആർട്സ് ആൻഡ് സയൻസിലെ ജനറൽ ലൈബ്രറി പുറത്തിറക്കിയ മൂന്നാമത്  പുസ്തകം പ്രകാശനം ചെയ്തു. ഡിപ്പാർട്ടമെന്റ് ഓഫ് കൊമേഴ്‌സ് വിഭാഗം അസി. പ്രൊഫസറായ നിഖിൽ ദേവ് പി പി യുടെ  കവിതാ സമാഹാരമായ 'ഹൃദയാരവം' ആണ്  പ്രമുഖ സാഹിത്യകാരനും 2024 ലെ എസ് കെ പൊറ്റക്കാട് അവാർഡ് ജേതാവുമായ  നിസാർ ഇൽത്തുമിഷിൽ നിന്ന് അധ്യാപകനും സാമൂഹിക പ്രവർത്തകനുമായ സലിം മടവൂർ ഏറ്റുവാങ്ങി  പ്രകാശനം ചെയ്തത്. പുസ്തകവായന കേന്ദ്രം  എന്നതിലുപരി അറിവുൽപാദന കേന്ദ്രമായി ലൈബ്രറിയെ മാറ്റുക എന്ന ഉദ്ദേശത്തോടെയാണ് മർകസ് ലൈബ്രറിക്ക് കീഴിൽ പുസ്തക പ്രകാശന സംവിധാനം  ആരംഭിച്ചത്. വിദ്യാർത്ഥികളുടെയും അധ്യാപകരുടെയും രചനകൾ വെളിച്ചം കാണിക്കുക എന്ന ലക്ഷ്യത്തോടെ പുറത്തിറക്കുന്ന മൂന്നാമത് പുസ്തകമാണിത്. ഇന്റർനാഷണൽ സ്റ്റാൻഡേർഡ് ബുക് നമ്പറോട് കൂടിയാണ്  പുസ്തകങ്ങൾ പ്രസിദ്ധീകരിക്കുന്നത്.

പ്രകാശന ചടങ്ങിൽ കോളേജ് പ്രിൻസിപ്പൽ, പ്രൊഫ. ഉമർ ഫാറൂഖ് ഉദ്ഘാടനം  നിർവഹിച്ചു. ഓറിയന്റൽ  ലാംഗ്വേജ് വിഭാഗം തലവൻ വിനോദ്‌കുമാർ കെ കെ  പുസ്തക പരിചയം നടത്തി സംസാരിച്ചു. രചയിതാവ് നിഖിൽ ദേവ് പി പി  മറുഭാഷണം നടത്തി. വൈസ് പ്രിൻസിപ്പൽ ഡോ. രാഘവൻ, ഇംഗ്ലീഷ് വിഭാഗം പ്രൊഫസർ സയ്യിദ് സബൂർ ബാ ഹസൻ, ഇംഗ്ലീഷ് വിഭാഗം മേധാവി  പ്രിയത സംബന്ധിച്ചു. ലൈബ്രെറിയൻ കെ എസ് ബിന്ദു സ്വാഗതവും,  റീഡേഴ്സ് ഫോറം സെക്രട്ടറി അബൂ സ്വാലിഹ്  നന്ദിയും പറഞ്ഞു.