നോളജ് സിറ്റി: അമേരിക്കയിലെ ചിക്കാഗോയില്‍ വെച്ച് നടക്കുന്ന അന്താരാഷ്ട്ര സമ്മിറ്റില്‍ പങ്കെടുക്കാനായി മര്‍കസ് നോളജ് സിറ്റി സി ഇ ഒ ഡോ. അബ്ദുസ്സലാം മുഹമ്മദ് അമേരിക്കയിലെ ചിക്കാഗോയിലേക്ക് പുറപ്പെടുന്നു. ജലോപയോഗ- മാലിന്യ സംസ്‌കരണ മേഖലയിലെ അന്താരാഷ്ട്ര സംഘടനയായ ഡബ്ല്യു ഡബ്ല്യു എം ഐ യൂണിവേഴ്‌സിറ്റി ഓഫ് ഇലിനോയ്‌സ് ചിക്കാഗോ, പെര്‍ദു യൂണിവേഴ്‌സിറ്റി, യൂണിവേഴ്‌സിറ്റി ഓഫ് ഫ്‌ലോറിഡ എന്നിവരുടെ സഹകരണത്തോടെയാണ് സമ്മിറ്റ് സംഘടിപ്പിക്കുന്നത്. പുനരുത്പാദനം സാധ്യമാകാത്ത ജലം, വായു, മണ്ണ്, സൂര്യപ്രകാശം എന്നിവയുടെ സംരംക്ഷണവും പരിപാലനവും സംബന്ധിച്ച് ഈ മാസം 26 മുതല്‍ 29 വരെയാണ് അന്താരാഷ്ട്ര സമ്മിറ്റി നടക്കുന്നത്. ലോകത്തിന്റെ വിവിധ ഭാഗങ്ങളിലെ നാല്‍പതോളം രാജ്യങ്ങളില്‍ നിന്നുള്ള വിദഗ്ധരാണ് സമ്മിറ്റില്‍ സംബന്ധിക്കുന്നത്.
മര്‍കസ് നോളജ് സിറ്റിയില്‍ നടപ്പാക്കിയിരിക്കുന്ന ജല, മാലിന്യ, വെളിച്ച, മണ്ണ് സംരംക്ഷണ പദ്ധതികളെ വിവിധ ലോക രാജ്യങ്ങളില്‍ നിന്നുള്ള വിദഗ്ധരുടെ മുന്നില്‍ അവതരിപ്പിക്കാനും അവരുടെ നാടുകളില്‍ നടപ്പാക്കിയ വിവിധ പദ്ധതികളെ കുറിച്ച് പഠിക്കാനും പദ്ധതികളില്‍ പരസ്പര സഹകരണം നടപ്പാക്കാനുമാണ് സമ്മിറ്റ് കൊണ്ട് ശ്രമിക്കുന്നത്.
ഇതുവഴി മര്‍കസ് നോളജ് സിറ്റിയിലും പരിസര പ്രദേശത്തും പ്രായോഗികമായ ജലം സംരംക്ഷണ- പുനരുപയോഗ പദ്ധതികള്‍ ആവിഷ്‌കരിക്കാന്‍ സാധിക്കുമെന്ന് ഡോ. അബ്ദുസ്സലാം പ്രത്യാശ പ്രകടിപ്പിച്ചു.