കോഴിക്കോട്: പത്താം തരം പൊതുപരീക്ഷയിൽ മികച്ചനേട്ടം കരസ്ഥമാക്കിയ മദ്റസകൾക്കുള്ള ഇസ്‌ലാമിക് എഡ്യൂക്കേഷണൽ ബോർഡിന്റെ എക്‌സലൻസി അവാർഡ് നേടി കൈതപ്പൊയിൽ മർകസ് പബ്ലിക് സ്കൂൾ. തുടർച്ചയായ നാലാം വർഷമാണ് ഈ നേട്ടം സ്കൂളിനെ തേടിയെത്തുന്നത്. 2024-25 അധ്യയന വർഷത്തെ പൊതുപരീക്ഷ എഴുതിയ എല്ലാ വിദ്യാർഥികളും മുഴുവൻ വിഷയങ്ങളിലും എ പ്ലസ് നേടിയതിലൂടെയാണ് സ്കൂളിന് അവാർഡ് ലഭിച്ചത്. 17 കുട്ടികൾക്ക് എല്ലാ വിഷയത്തിലും എ പ്ലസ് പ്ലസുമുണ്ട്.

മുഴുവൻ മാർക്കും നേടിയവർക്ക് എഡ്യൂക്കേഷണൽ ബോർഡ് നൽകുന്ന പ്രതിഭാ പുരസ്കാരത്തിന് ഇസ്സ ഫാത്വിമ ഇ സി, നജ ഫാത്വിമ ഇ, നാഫിയ നസ്‌റിൻ, ആഇശ ലുബ്‌ന എന്നീ വിദ്യാർഥികൾ അർഹരായി. സംസ്ഥാന തലത്തിൽ രണ്ടാം സ്ഥാനം ഇതേ സ്കൂളിലെ മുഹമ്മദ് ബിശ്ർ, ദിയാന മുജ്തബിൻ എംഎ, മിൻഹ ഫാത്വിമ കരസ്ഥമാക്കി. മർകസ് ഗ്രൂപ് ഓഫ് സ്കൂൾസിന് കീഴിൽ പ്രവർത്തിക്കുന്ന ബാലുശ്ശേരി, എ ആർ നഗർ സ്കൂളുകളും ഇത്തവണ എക്‌സലൻസി അവാർഡ് നേടിയിട്ടുണ്ട്.  

മികച്ച വിജയത്തിന് പിന്നിൽ പ്രവർത്തിച്ച സ്കൂൾ മാനേജ്‌മെന്റിനെയും അധ്യാപകരെയും വിദ്യാർഥികളെയും മർകസ്‌ ഫൗണ്ടർ ചാൻസിലർ കാന്തപുരം എ പി അബൂബക്കർ മുസ്‌ലിയാർ അഭിനന്ദിച്ചു. എക്‌സലൻസി അവാർഡ് സ്കൂൾ പ്രതിനിധികൾ ഉസ്താദിന് സമർപ്പിച്ചു. ചടങ്ങിൽ അബ്ദുൽ മഹ്മൂദ് കെകെ, ജബ്ബാർ സഖാഫി, സിറാജുദ്ദീൻ പനങ്ങോട്ടിൽ, നാസർ ഹിശാമി സംബന്ധിച്ചു.