കാരന്തൂർ: മർകസു സഖാഫത്തി സുന്നിയ്യയുടെ ആശയ വികസനത്തിലും പുരോഗതിയിലും മർഹൂം ഇ കെ ഹസൻ മുസ്‌ലിയാർ നിർവഹിച്ച നേതൃപരമായ ദൗത്യങ്ങൾ നിർണായകമായിരുന്നെന്നും കേരളത്തിലെ സുന്നി ആദർശ മുന്നേറ്റത്തിൽ അദ്ദേഹത്തെ വിസ്മരിക്കാനാവില്ലെന്നും കാന്തപുരം എപി അബൂബക്കർ മുസ്‌ലിയാർ. ഹസൻ മുസ്‌ലിയാരുടെ 45 -ാം ആണ്ട് നേർച്ചയോടനുബന്ധിച്ച് പുളിക്കലിലെ 33 മഹല്ലുകൾ മർകസിനായി സമാഹരിച്ച വിഭവങ്ങൾ സ്വീകരിച്ച് സംസാരിക്കുകയായിരുന്നു അദ്ദേഹം. സുന്നത്ത് ജമാഅത്തിന്റെ സ്ഥാപനങ്ങൾക്കും സംവിധാനങ്ങൾക്കുമായി ഓടിനടന്നിരുന്ന ഹസൻ മുസ്‌ലിയാരുടെ മാതൃക പിൻപറ്റി അദ്ദേഹത്തിന്റെ ഇഷ്ടജനങ്ങളും ശിഷ്യരും നടത്തിയ വിഭവ സമാഹരണം പ്രശംസിക്കപ്പെടേണ്ടതാണെന്നും കാന്തപുരം ഉസ്താദ് പറഞ്ഞു. 

മലപ്പുറം ജില്ലയുടെ വടക്കുപടിഞ്ഞാറൻ മേഖലയിലെ 33 മഹല്ലുകളാണ് വിവിധ മർകസ് സ്ഥാപനങ്ങളിൽ പഠിക്കുന്ന വിദ്യാർഥികളുടെ ഭക്ഷണ ചിലവിലേക്കായി പത്തിലധികം ലോറികളിൽ ഒന്നാംഘട്ട വിഭവങ്ങളുമായെത്തിയത്. 'ഹസൻ മുസ്‌ലിയാർ സ്മരണയിൽ മർകസിനൊപ്പം കൈകോർക്കാം' എന്ന ശീർഷകത്തിൽ നടത്തിയ പദ്ധതിയിൽ കാന്തപുരം ഉസ്താദ് ഖാളിയും  നേതൃത്വം നൽകുന്നതുമായ മഹല്ലുകളാണ് ഭാഗമായത്. രണ്ടാംഘട്ടത്തിൽ പ്രദേശത്തെ മറ്റു മഹല്ലുകളുടെ വിഭവങ്ങളും വരും ദിവസങ്ങളിൽ മർകസിലെത്തും. ചേളാരി മഹല്ലിൽ നിന്ന് സയ്യിദ് ശറഫുദ്ദീൻ ജമലുല്ലൈലിയുടെ നേതൃത്വത്തിൽ ആരംഭിച്ച വിഭവ സമാഹരണ യാത്ര വിവിധ മഹല്ലുകളിൽ പര്യടനം നടത്തിയാണ് മർകസിലെത്തിയത്. പദ്ധതിക്ക്  സി പി ബീരാൻ മുസ്‌ലിയാർ അരീക്കോട്, മൊയ്തീൻ കുട്ടി സഖാഫി യൂനിവേഴ്സിറ്റി, ടി അബ്ദുൽ അസീസ് ഹാജി പുളിക്കൽ, തറയിട്ടാൽ ഹസൻ സഖാഫി , കുഞ്ഞിഹാജി എടവണ്ണപ്പാറ, കെവി മൊയ്തീൻ മുസ്‌ലിയാർ വലിയപറമ്പ്, റഷീദ് ഹാജി ചാലിയപ്പുറം, സ്വാലിഹ് ഫൈസി മുണ്ടുമുഴി , അബ്ദുൽ കരീം ബാഖവി പൊന്നാട്, വി ടി എ റഹ്മാൻ ആൽപറമ്പ്, റശീദ് ബുഖാരി പുളിയക്കോട്, ഉമറലി സഖാഫി പറവൂർ നേതൃത്വം നൽകി.