കോഴിക്കോട്: മർകസ് ഇന്റർനാഷണൽ സ്കൂൾ 'ഇയർ ഓഫ് എക്സലൻസ്' പദ്ധതിയുടെ ഭാഗമായി നടപ്പിലാക്കുന്ന 'എം.ഐ.എസ് സിവിൽ സർവീസ് ഫൗണ്ടേഷൻ പ്രോഗ്രാം' ജില്ലാ കളക്ടർ എം.എസ്. മാധവിക്കുട്ടി ഐ.എ.എസ്. ഉദ്ഘാടനം ചെയ്തു. കളക്ടറേറ്റിൽ നടന്ന ചടങ്ങിൽ പ്രോഗ്രാമിന്റെ ഔദ്യോഗിക പ്രഖ്യാപനവും ഉദ്ഘാടനവും കളക്ടർ നിർവഹിച്ചു. വിദ്യാർഥികളിൽ ചെറുപ്രായം മുതൽ തന്നെ സിവിൽ സർവീസ് അഭിരുചി വളർത്തിയെടുക്കാനും, അവരെ ദേശീയ-അന്തർദേശീയ തലങ്ങളിലെ സിവിൽ സർവീസ് കരിയറുകളിലേക്ക് നയിക്കാനും ലക്ഷ്യമിട്ടുള്ളതാണ് ഈ ഫ്ലാഗ്ഷിപ്പ് പ്രോഗ്രാം.

5 മുതൽ 9 വരെയുള്ള ക്ലാസുകളിലെ വിദ്യാർഥികൾക്കായാണ് ഈ പ്രത്യേക കോഴ്സ് രൂപകൽപ്പന ചെയ്തിരിക്കുന്നത്. ആഴ്ചയിൽ മൂന്ന് മണിക്കൂർ വീതമാണ് പരിശീലന ക്ലാസുകൾ ക്രമീകരിച്ചിരിക്കുന്നത്. ചടങ്ങിൽ അഡ്മിനിസ്ട്രേറ്റീവ് ഓഫീസർ സഅ്ദുദ്ദീൻ സഖാഫി, പ്രിൻസിപ്പൽ മുഹമ്മദ് ഹാഫിസ് അദനി, പി.ടി.എ. പ്രസിഡന്റ് നിസാർ പുതിയങ്ങാടി, ഹെഡ്മിസ്ട്രസ് ഗീത, പ്രോഗ്രാം കോർഡിനേറ്റർ ഷാജില പി.ടി., നജാ ഫാത്തിമ പങ്കെടുത്തു.