കൊയിലാണ്ടി: വിശ്വാസി സമൂഹത്തിന് മാർഗദർശനം നൽകുന്ന പരിശുദ്ധ ഖുർആനുമായി അടുത്തിടപഴകുന്നതും ഖുർആൻ പഠനത്തിനും വ്യാപനത്തിനുമായി പ്രവർത്തിക്കുന്നതും ഏറെ മഹത്തരമാണെന്ന് മർകസ് ഡയറക്ടർ ജനറൽ സി. മുഹമ്മദ് ഫൈസി. മർകസ് ഖൽഫാൻ ഇസ്‌ലാമിക് സെന്ററിന് കീഴിലുള്ള ഖുർആൻ അക്കാദമിയിൽ നടന്ന 'മിസ്കുൽ ഖിതാം' ഹിഫ്ള് പൂർത്തീകരണ സംഗമവും തൻമിയ പ്രോജക്ട് ലോഞ്ചിംഗും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഖൽഫാൻ പൂർവ്വ വിദ്യാർഥി കൂട്ടായ്മയായ കഹ്ഫിന്റെ നേതൃത്വത്തിൽ നടപ്പാക്കിയ 'തൻമിയ' വികസന പദ്ധതി മർകസ് പ്രസിഡന്റ് സയ്യിദ് അലി ബാഫഖി തങ്ങൾ സമർപ്പിച്ചു. ഖുർആൻ പഠനവും ഗവേഷണവും പ്രോത്സാഹിപ്പിക്കുന്നതിനായുള്ള അടിസ്ഥാന സൗകര്യ വിപുലീകരണവും സ്മാർട്ട് ക്ലാസ് റൂമുകളുമാണ് ആദ്യ ഘട്ടത്തിൽ സമർപ്പിച്ചത്.

ഖുർആൻ പൂർണമായി മനഃപാഠമാക്കിയ വിദ്യാർഥികളെ ചടങ്ങിൽ ആദരിച്ചു. മർകസ് എം എം ഐ ചീഫ് അഡ്മിനിസ്‌ട്രേറ്റീവ് ഓഫീസർ വിഎം. റഷീദ് സഖാഫി അനുമോദന പ്രസംഗം നടത്തി.

പരിപാടിയിൽ  മുഹമ്മദ് സുഹൈൽ സഖാഫി അധ്യക്ഷത വഹിച്ചു. അബ്ദുൽ നാസിർ സഖാഫി, ഇസ്സുദ്ദീൻ സഖാഫി,  അഷ്റഫ് സഖാഫി, അബ്ദുസ്സമദ് സഖാഫി മൂർക്കനാട്, അബ്ദുൽ ഹസീബ് സഖാഫി കൊണ്ടോട്ടി, അബ്ദുൽ ഹകീം ഹാറൂനി, ജഹ്ഫർ സഖാഫി, ആഷിഖ് സഖാഫി പൈലിപ്പുറം സംസാരിച്ചു. വിദ്യാർഥികൾ, പൂർവ്വ വിദ്യാർഥികൾ, രക്ഷിതാക്കൾ, വിശിഷ്ടാതിഥികൾ സംബന്ധിച്ചു.