കോഴിക്കോട്: ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സീസിയുടെ മേൽനോട്ടത്തിൽ മതകാര്യ വകുപ്പിന്റെ ആഭിമുഖ്യത്തിൽ നടക്കുന്ന 11-ാ മത് അന്താരാഷ്‌ട്ര സമ്മേളനത്തിൽ മർകസ് റെക്ടർ ഡോ. മുഹമ്മദ് റോഷൻ നൂറാനി പങ്കെടുക്കും. 'ആഗോളമാറ്റങ്ങളും കുടുംബങ്ങൾ നേരിടുന്ന വെല്ലുവിളികളും' എന്ന പ്രമേയത്തിൽ തലസ്ഥാനമായ കൈറോയിൽ ഇന്ന് നടക്കുന്ന സമ്മേളനത്തിൽ 80 ലധികം രാജ്യങ്ങളിൽ നിന്നുള്ള പ്രമുഖരാണ് അതിഥികളായെത്തുന്നത്. ഈജിപ്ഷ്യൻ ഗ്രാൻഡ് മുഫ്തി ഡോ. നസീർ മുഹമ്മദ് അയ്യദിന്റെ ക്ഷണപ്രകാരമാണ് ഇന്ത്യൻ ഗ്രാൻഡ് മുഫ്തി കാന്തപുരം എ.പി അബൂബക്കർ മുസ്‌ലിയാരുടെ പ്രതിനിധിയായി ഡോ. റോഷൻ നൂറാനി പങ്കെടുക്കുന്നത്. മതകാര്യ വകുപ്പിന് കീഴിലെ ദാറുൽ ഇഫ്താ അൽ മിസ്‌രിയ്യയുടെയും ജനറൽ സെക്രട്ടറിയേറ്റ് ഓഫ് ഫത്‌വ അതോറിറ്റീസ് വേൾഡ് വൈഡിന്റെയും സംയുക്താഭിമുഖ്യത്തിലാണ് ദ്വിദിന സമ്മേളനം സംഘടിപ്പിക്കുന്നത്.

ആധുനിക വ്യക്തിസ്വാതന്ത്ര്യവും കുടുംബ ഐക്യത്തിലും പങ്കാളിത്ത ഉത്തരവാദിത്തങ്ങളിലും അത് ചെലുത്തുന്ന സ്വാധീനം, മനുഷ്യബന്ധങ്ങൾ, കൂട്ടായ്മ, സാമൂഹിക ബന്ധങ്ങൾ എന്നിവയിൽ ഡിജിറ്റൽ ഏകാന്തത വരുത്തുന്ന പ്രത്യാഘാതങ്ങൾ, കുടുംബത്തെ ബാധിക്കുന്ന സാമൂഹിക, സാംസ്കാരിക, സാമ്പത്തിക, സാങ്കേതിക മാറ്റങ്ങൾ എന്നിവയാണ് പ്രധാന ചർച്ചാവിഷയങ്ങൾ. പുതിയ വെല്ലുവിളികളെ നേരിടാൻ പ്രായോഗിക പ്രതികരണങ്ങൾ രൂപപ്പെടുത്തുന്നതിൽ ഫത്‌വ സ്ഥാപനങ്ങളുടെയും മതപരമായ സാംസ്കാരിക-വിദ്യാഭ്യാസ സ്ഥാപനങ്ങളുടെയും പങ്ക് സമ്മേളനം എടുത്തുപറയും.

സമകാലിക പ്രസക്തമായ വിഷയങ്ങളിൽ ഗൗരവമേറിയ അന്താരാഷ്‌ട്ര ചർച്ചകൾ സംഘടിപ്പിക്കുന്ന ഈജിപ്ഷ്യൻ മതകാര്യ വകുപ്പിനെയും ഫത്‌വ അതോറിറ്റിയേയും ഇന്ത്യൻ ഗ്രാൻഡ് മുഫ്തി അഭിനന്ദിച്ചു. ജാമിഅ മർകസ് ഫൗണ്ടർ ചാൻസിലർ കൂടിയായ ഗ്രാൻഡ് മുഫ്തിയുടെ അനുമോദന പത്രവും ഉപഹാരവും ഡോ. റോഷൻ നൂറാനി ഈജിപ്ഷ്യൻ ഗ്രാൻഡ് മുഫ്തിക്ക് കൈമാറും.