ക്വാലാലംപൂര്‍ (മലേഷ്യ): മലേഷ്യയിലെ വേള്‍ഡ് ട്രേഡ് സെന്ററില്‍ വെച്ച് നടക്കുന്ന മദനി അന്താരാഷ്ട്ര സിമ്പോസിയത്തില്‍ ജാമിഅ മര്‍കസ് റെക്ടര്‍ ഡോ. മുഹമ്മദ് അബ്ദുല്‍ ഹകീം അസ്ഹരി പങ്കെടുക്കും. ഈ മാസം 3, 4 തീയതികളില്‍ 'ഇസ്ലാമും മിതത്വവും' എന്ന പ്രമേയത്തിലാണ് ഈ വര്‍ഷത്തെ സിമ്പോസിയം നടക്കുന്നത്. മിതത്വമുള്ള മുസ്ലിം സമൂഹത്തെ ആധുനിക ലോക സമ്പ്രദായങ്ങളിലേക്ക് പരുവപ്പെടുത്തുക എന്നതാണ് സിമ്പോസിയം കൊണ്ടുള്ള പ്രധാന ലക്ഷ്യം.
ലോകോത്തര പണ്ഡിതരും നേതാക്കളും പങ്കെടുക്കുന്ന ചര്‍ച്ചകളില്‍ മലേഷ്യന്‍ പ്രധാനമന്ത്രി അന്‍വര്‍ ഇബ്‌റാഹീമും, അല്‍ അസ്ഹര്‍ ഗ്രാന്‍ഡ് ഇമാം പ്രൊഫ. അഹ്‌മദ് അത്തൊയ്യിബും പങ്കെടുക്കും. വ്യത്യസ്ത രാഷ്ട്രങ്ങളിലെ മദ്‌റസാ സമ്പ്രദായങ്ങളെ കുറിച്ചുള്ള ചര്‍ച്ചയില്‍ ഇന്ത്യയെ പ്രതിനിധീകരിച്ചായിരിക്കും ഇന്ത്യന്‍ ഗ്രാന്‍ഡ് മസ്ജിദ് ജാമിഉല്‍ ഫുതുഹ് ചീഫ് ഇമാം കൂടിയായ അസ്ഹരി സംബന്ധിക്കുക.
'ദക്ഷിണേന്ത്യന്‍ പണ്ഡിതരും ആധുനിക മദ്‌റസാ രീതിശാസ്ത്രവും' എന്ന തലക്കെട്ടില്‍ അദ്ദേഹം പ്രബന്ധം അവതരിപ്പിക്കും. ആധുനികതക്കിടയിലും മദ്‌റസാ പാരമ്പര്യങ്ങള്‍ എന്ത് കൊണ്ട് പ്രസക്തമാകുന്നു എന്ന് വിപുലമായി ചര്‍ച്ച ചെയ്യപ്പെടും.

വിവിധ ലോക രാജ്യങ്ങളിലെ മുസ്ലിം പണ്ഡിതര്‍ തമ്മിലുള്ള പരസ്പര ബന്ധവും അവര്‍ക്കിടയിലെ ആരോഗ്യകരമായ ചര്‍ച്ചകളും മദനി അന്താരാഷ്ട്ര സിമ്പോസിയത്തിന്റെ ലക്ഷ്യങ്ങളാണ്. മിതത്വവും അതോടൊപ്പം തന്നെ പുരോഗതിയുമുള്ള നീക്കങ്ങളിലൂടെ ഇസ്ലാമിക വിദ്യാഭ്യാസ വ്യവസ്ഥിതിയെ കൂടുതല്‍ മെച്ചപ്പെടുത്താന്‍ ആവശ്യമായ ചര്‍ച്ചകളായിരിക്കും ഈ വര്‍ഷം കൂടുതലായും ഉണ്ടാവുക.