നോളജ് സിറ്റി: അന്താരാഷ്ട്ര പ്രവാചക പ്രകീർത്തന വേദികളിലെ സ്ഥിര സാന്നിധ്യവും ബഹ്‌റൈനിലെ പ്രമുഖ പണ്ഡിതനുമായ ഷെയ്ഖ് റാഷിദ് ബിൻ ഇബ്രാഹിം അൽ മുറൈഖി, പ്രിയ സുഹൃത്ത് കാന്തപുരം എ പി അബൂബക്കർ മുസ്‌ലിയാരെ സന്ദർശിച്ചു. ബഹറൈൻ രാജ കുടുംബമായും അന്താരാഷ്ട്ര പണ്ഡിതരുമായുമെല്ലാം അടുപ്പമുള്ള റാഷിദ് അൽ മുറൈഖിയും കാന്തപുരവുമായി മൂന്ന് പതിറ്റാണ്ടുകളായുള്ള ഗാഢമായ സൗഹൃദമുണ്ട്.

കോവിഡ് കാലം തീർത്ത വിടവും കാന്തപുരത്തിന്റെ വിശ്രമ കാല  ഇടവേളയും കഴിഞ്ഞ് ആദ്യമായാണ് ഷെയ്ഖ് റാഷിദ് ബിൻ ഇബ്രാഹിം അൽ മുറൈഖി കേരളത്തിൽ എത്തുന്നത്. കാലങ്ങളായി കാരന്തൂർ മർകസ് സമ്മേളനങ്ങൾക്ക് സ്ഥിര സാന്നിധ്യമാണ് അദ്ദേഹം. മർകസിലേക്ക് നിരവധി പണ്ഡിതന്മാരെയും മാദിഹീങ്ങളെയും അദ്ദേഹം എത്തിക്കാറുമുണ്ട്.

മർകസ് നോളജ് സിറ്റിയിലെ ജാമിഉൽ ഫുതൂഹിൽ നടന്ന 'ഹള്റത്തുൽ ഫുതൂഹ്' ആത്മീയ സദസ്സിൽ കാന്തപുരത്തോടൊപ്പം അദ്ദേഹം പങ്കെടുത്തു. ഷെയ്ഖ് അഹ്മദ് അബരി, ഷെയ്ഖ് വലീദ് ബുറൈഖി എന്നിവരും അദ്ദേഹത്തെ അനുഗമിച്ചു. നോളജ് സിറ്റിയിലെ ടൈഗ്രിസ് വാലിയിൽ വെച്ച് നടന്ന കൂടിക്കാഴ്ചയിൽ ബഹറൈന്റെ പാരമ്പര്യവും പൈതൃകവും വിളിച്ചോതുന്ന പ്രത്യേകമായി കൊണ്ട് വന്ന സമ്മാനങ്ങളും സംഘം കാന്തപുരം എ പി അബൂബക്കർ  മുസ്‌ലിയാർക്ക് സമ്മാനിച്ചു. ഡോ. അബ്ദുൽ ഹകിം അസ്ഹരി സംബന്ധിച്ചു.