കോഴിക്കോട്: പ്രവാചകൻ മുഹമ്മദ് നബിയുടെ 1497-ാം ജന്മദിനാഘോഷങ്ങളുടെ ഭാഗമായി മർകസ് നടത്തുന്ന അൽമഹബ്ബ അന്താരാഷ്ട്ര മീലാദ് ക്യാമ്പയിൻ ആരംഭിച്ചു. ഒരുമാസം നീണ്ടുനിൽക്കുന്ന ക്യാമ്പയിൻ പ്രഖ്യാപന സമ്മേളനം കാന്തപുരം എ പി മുഹമ്മദ് മുസ്‌ലിയാർ ഉദ്ഘാടനം ചെയ്തു. മുഹമ്മദ് നബി സ്വീകരിച്ച നിലപാടുകളും മാതൃകകളും സമൂഹത്തിൽ പ്രചരിപ്പിക്കാനും അതുൾക്കൊണ്ട് ജീവിക്കാനും വിശ്വാസികൾ തയ്യാറാവണമെന്ന് അദ്ദേഹം പറഞ്ഞു. 

 'തിരുനബി(സ്വ): പ്രപഞ്ചത്തിന്റെ വെളിച്ചം' എന്ന പ്രമേയത്തിൽ നടക്കുന്ന ക്യാമ്പയിനിൽ മർകസുമായി അക്കാദമിക്‌ സഹകരണമുള്ള വിവിധ വിദേശ യൂണിവേഴ്‌സിറ്റികളും  ഇന്ത്യയിലെ 23 സംസ്ഥാനങ്ങളിലെ മർകസ് ക്യാമ്പസുകളും ഭാഗമാകും. യു കെ, യു എ ഇ, മലേഷ്യ, ഈജിപ്ത്, ഫിജി, സൗദി അറേബ്യ, തുർക്കി, ബഹ്‌റൈൻ, ഓസ്‌ട്രേലിയ, കുവൈത്ത്, സിംഗപ്പൂർ, ടുണീഷ്യ, ഒമാൻ, ജോർദാൻ, ന്യൂസിലാന്റ്, നേപ്പാൾ, ബംഗ്ലാദേശ് തുടങ്ങിയ രാജ്യങ്ങളിൽ മർകസ് പൂർവ്വവിദ്യാർഥി സംഘടനകൾ അൽ മഹബ്ബ ക്യാമ്പയിന് നേതൃത്വം നൽകും.   

അൽ മൗലിദുൽ അക്ബർ, അക്കാദമിക് സെമിനാർ, സ്നേഹ സംഗമം, ഇശൽ സന്ധ്യ, മീലാദ് ഫെസ്റ്റ്, ഓൺലൈൻ ക്വിസ്, കാലിഗ്രഫി മത്സരം,  പ്രഭാഷണങ്ങൾ, ഫ്‌ളാഷ്‌മോബ്, കുട്ടികളുടെ നബി, ജൽസത്തുൽ മഹബ്ബ തുടങ്ങിയ സംഗമങ്ങളും കലാപരിപാടികളും മീലാദാഘോഷത്തിന്റെ ഭാഗമായി സംഘടിപ്പിക്കും. പതിനായിരക്കണക്കിന് സ്നേഹജനങ്ങൾ സംഗമിക്കുന്ന അൽമൗലിദുൽ അക്ബർ ഒക്ടോബർ 3 ന് സുബ്ഹ് നിസ്‌കാരാനന്തരം മർകസ് കൺവെൻഷൻ സെന്ററിൽ ആരംഭിക്കും. 

ചടങ്ങിൽ വിപിഎം ഫൈസി വില്യാപ്പള്ളി ക്യാമ്പയിൻ ലോഗോ പ്രകാശനം ചെയ്തു. മുഹമ്മദലി സഖാഫി വള്ളിയാട് കർമ പദ്ധതികൾ വിശദീകരിച്ചു. സി യൂസുഫ് ഹൈദർ പന്നൂർ, അബൂബക്കർ ഹാജി കിഴക്കോത്ത്, അമീർ ഹസ്സൻ, അബൂബക്കർ സഖാഫി പന്നൂർ, വിഎം അബ്ദുറഷീദ് സഖാഫി, അക്ബർ ബാദുഷ സഖാഫി, കെകെ ശമീം, സിപി സിറാജുദ്ദീൻ സഖാഫി, ഉനൈസ് മുഹമ്മദ്, എകെ മൂസ ഹാജി, സഹ്ൽ സഖാഫി കട്ടിപ്പാറ സംബന്ധിച്ചു. 

അൽ മഹബ്ബ; മർകസ് അന്താരാഷ്ട്ര മീലാദ് ക്യാമ്പയിൻ പ്രഖ്യാപന സമ്മേളനം കാന്തപുരം എ.പി മുഹമ്മദ് മുസ്ലിയാർ ഉദ്ഘാടനം ചെയ്യുന്നു.