കോഴിക്കോട്: ആയിരം മാസങ്ങളുടെ പുണ്യം തേടി റമസാനിലെ അവസാന ദിനങ്ങളിൽ ആയിരക്കണക്കിന് വിശ്വാസികൾ സംഗമിക്കുന്ന ആത്മീയ സമ്മേളനം നാളെ  കാരന്തൂർ മർകസിൽ നടക്കും. ഉച്ചക്ക് ഒന്നു മുതൽ   പുലർച്ചെ ഒന്നു വരെ നടക്കുന്ന  സമ്മേളനത്തിന് പ്രശസ്ത പണ്ഡിതരും ആത്മീയ നേതാക്കളും നേതൃത്വം നൽകും. ഇന്ത്യൻ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാരുടെ വാർഷിക പ്രഭാഷണമാണ് സമ്മേളനത്തിന്റെ മുഖ്യ ആകർഷണീയത. ഖത്മുൽ ഖുർആൻ, വിർദുലത്തീഫ്, തൗബ, തഹ്‌ലീൽ, അസ്മാഉൽ ഹുസ്ന, ഇഅതികാഫ് ജൽസ തുടങ്ങി വിവിധ ആത്മീയ പ്രാർത്ഥനാ സദസ്സുകൾ സമ്മേളനത്തിനോടനുബന്ധിച്ച് നടക്കും.

നാളെ  ളുഹ്ർ നിസ്‌കാരാനന്തരം സമസ്ത കേരള ജംഇയ്യത്തുൽ ഉലമ പ്രസിഡന്റ് ഇ സുലൈമാൻ മുസ്‌ലിയാർ സമ്മേളനം ഉത്‌ഘാടനം ചെയ്യും. ഡയറക്ടർ ജനറൽ സി മുഹമ്മദ് ഫൈസി അധ്യക്ഷത വഹിക്കും. നൗഫൽ സഖാഫി കളസ പ്രഭാഷണം നടത്തും. അസർ നിസ്കാര ശേഷം നടക്കുന്ന ഖത്മുൽ ഖുർആൻ സംഗമത്തിൽ മർകസ് സഹകാരികളെയും പ്രവർത്തകരെയും അനുസ്മരിക്കും. മർകസ് റൈഹാൻ വാലി അനാഥാലയത്തിലെ പൂർവ്വവിദ്യാർഥികളുടെ കുടുംബങ്ങൾ പൂർത്തിയാക്കിയ 4444 ഖുർആൻ ഖത്മുകൾ  ചടങ്ങിൽ സമർപ്പിക്കും. വിവിധ ഖുർആൻ അകാദമികളിലെ അധ്യാപകരും  വിദ്യാർത്ഥികളും ഖത്മുൽ ഖുർആൻ സംഗമത്തെ ഭക്തിസാന്ദ്രമാക്കും.

സമ്മേളനത്തിനെത്തുന്നവർക്ക് മസ്ജിദിന് സമീപം പ്രത്യേകം സജ്ജമാക്കിയ പന്തലിൽ ഗ്രാൻഡ് കമ്യൂണിറ്റി ഇഫ്താർ ഒരുക്കിയിട്ടുണ്ട്. ഇഫ്താറിന് ശേഷം തസ്ബീഹ് നിസ്കാരം, അവ്വാബീൻ നിസ്കാരം, തറാവീഹ്, വിത്ർ നിസ്കാരം തുടങ്ങിയവ മസ്ജിദുൽ ഹാമിലിയിൽ നടക്കും. രാത്രി പത്തിന് കൺവെൻഷൻ സെന്ററിൽ ആത്മീയ സമ്മേളനത്തിന്റെ പ്രധാന ചടങ്ങുകൾ ആരംഭിക്കും. കേരള  മുസ്ലിം ജമാഅത്ത് ജനറൽ സെക്രട്ടറി സയ്യിദ് ഇബ്രാഹീമുൽ ഖലീൽ ബുഖാരി ഉത്‌ഘാടനം ചെയ്യും. സയ്യിദ് അലി ബാഫഖി തങ്ങൾ പ്രാർഥന നിർവ്വഹിക്കും. സയ്യിദ് ത്വാഹാ സഖാഫി, സയ്യിദ് ജലാലുദ്ദീൻ ജീലാനി വൈലത്തൂർ, സയ്യിദ് മുഹമ്മദ് തുറാബ് സഖാഫി, സയ്യിദ് സബൂർ അവേലം, സുഹൈൽ തങ്ങൾ മടക്കര, സയ്യിദ് പൂക്കോയ തങ്ങൾ, ഡോ. ഹുസൈൻ സഖാഫി ചുള്ളിക്കോട്, ഡോ. എപി അബ്ദുൽ ഹകീം അസ്‌ഹരി, സി പി ഉബൈദുള്ള സഖാഫി സംബന്ധിക്കും. സയ്യിദ് ശിഹാബുദ്ദീൻ അഹ്ദൽ മുത്തനൂർ ദിക്ർ-ദുആ  സദസ്സിന് നേതൃത്വം നൽകും.

സമ്മേളനത്തിനെത്തുന്ന വിശ്വാസികളുടെ സൗകര്യാർത്ഥം പ്രധാന ക്യാമ്പസിലും പരിസരത്തും വിശാലമായ പാർക്കിങ് സൗകര്യങ്ങളും അനുബന്ധ സൗകര്യങ്ങളും സജ്ജീകരിച്ചിട്ടുണ്ട് .ലൈലത്തുൽ ഖദ്ർ പ്രതീക്ഷിക്കപ്പെടുന്ന റമസാനിലെ 25-ാം രാവിലെ ആത്മീയ സമ്മേളനത്തിൽ വിവിധ സംസ്ഥാനങ്ങളിൽ നിന്നുള്ള ആയിരക്കണക്കിന് വിശ്വാസികൾ പങ്കെടുക്കും. തത്സമയം സംപ്രേക്ഷണം മർകസ് ഔദ്യോ​ഗിക യൂട്യൂബ് ചാനലിൽ ലഭിക്കും. https://www.youtube.com/markazonline