നോളജ് സിറ്റി: വിശ്വ പ്രസിദ്ധ ആത്മീയ പുരുഷൻ അഹ്മദുൽ കബീർ രിഫാഇയുടെയും സമസ്ത വൈസ് പ്രസിഡണ്ട് സയ്യിദ് അലി ബാഫഖി തങ്ങളുടെയും സ്മരണയിൽ അലിഞ്ഞ് മർകസ് നോളജ് സിറ്റിയിലെ ജാമിഉൽ ഫുതൂഹ്. ശൈഖ് രിഫാഈയുടെയും സയ്യിദ് അലി ബാഫഖി തങ്ങളുടെയും ജീവിതത്തിലെ മനോഹരമായ പാഠങ്ങൾ പകർന്നെടുക്കാനും അവരുടെ ആത്മീയ വഴികളിൽ സഞ്ചരിക്കാനുമായി ആയിരക്കണക്കിന് വിശ്വാസികളാണ് നോളജ് സിറ്റിയിൽ എത്തിയത്. 

ജാമിഉൽ ഫുതൂഹ് ഇമാം ഡോ. മുഹമ്മദ് അബ്ദുൽ ഹക്കീം അസ്ഹരിയുടെ അധ്യക്ഷതയിൽ നടന്ന അനുസ്മരണ സമ്മേളനം മർകസ് ഡയറക്ടർ ജനറൽ സി മുഹമ്മദ് ഫൈസി ഉദ്ഘാടനം ചെയ്തു.

സമൂഹത്തിന്റെ ഏത് മേഖലകളിലുള്ള ആളുകൾക്കും പകർത്താവുന്ന മാതൃക ജീവിതങ്ങളാണ് ശൈഖ് രിഫാഈയും സയ്യിദ് അലി ബാഫഖി തങ്ങളും ഉൾപ്പെടെയുള്ള ഇസ്ലാമിൻറെ മഹാരഥന്മാർ കാണിച്ചുതന്നതെന്ന് അദ്ദേഹം സ്മരിച്ചു.

അവരുടെ ജീവിതം വരച്ചു കാണിക്കുന്ന ഗ്രന്ഥങ്ങളും പ്രഭാഷണങ്ങളും വഴി നന്മകൾ പകർത്തി എടുക്കണമെന്ന് അദ്ദേഹം കൂട്ടിച്ചേർത്തു. കേരള മുസ്ലിം ജമാഅത്ത് ജില്ലാ പ്രസിഡണ്ട് ടി കെ അബ്ദുറഹ്മാൻ ബാഖവി ആമുഖ പ്രഭാഷണവും അബൂബക്കർ സഖാഫി വെണ്ണക്കോട് അനുസ്മരണ പ്രഭാഷണവും നടത്തി.

ഡോ. കോയ കാപ്പാട്, അബ്ദുറഷീദ് സഖാഫി , കടൂർ, അബ്ദുൽ റഷീദ് ദാരിമി ചേലൂർ എന്നിവർ നേതൃത്വം നൽകിയ വിവിധ രിഫാഈ അംഗങ്ങളുടെ നേതൃത്വത്തിൽ ദഫ് റാത്തീബുകൾ നടന്നു. സയ്യിദ് നസീർ ശിഹാബ് തങ്ങൾ പാണക്കാട് സമാപന പ്രാർത്ഥനക്ക് നേതൃത്വം നൽകി. സയ്യിദ് അബ്ദുറഹ്മാൻ ബാഫഖി, സയ്യിദ് മുഹമ്മദ് കോയ തങ്ങൾ രാമന്തളി, സയ്യിദ് ഫസൽ പൂകോയ തങ്ങൾ കരുവൻതിരുത്തി ഹള്റ ആത്മീയ സംഗമത്തിന് നേതൃത്വം നൽകി.