1964 ഫെബ്രുവരി 28 ശവ്വാൽ 14 വെള്ളിയാഴ്ച കോഴിക്കോട് ജില്ലയിലെ മങ്ങാട് ജുമുഅത്ത് പള്ളിയിൽ വെല്ലൂർ ബാഖിയാത്തിലെ മുദരിസും പ്രമുഖ ഹദീസ് പണ്ഡിതനുമായ ശൈഖ് ഹസൻ ഹസ്‌റത്താണ് സുൽത്വാനുൽ ഉലമയുടെ ബുഖാരി ദർസിന് തുടക്കമിടുന്നത്. അന്നു മുതൽ മങ്ങാട്, കോളിക്കൽ, കാന്തപുരം അസീസിയ്യ അറബിക് കോളേജ്, മർകസ് ശരീഅ കോളേജ് എന്നിവിടങ്ങയിലായി നടത്തിയ ദർസാണ് ഇപ്പോൾ അറുപത് വർഷം പൂർത്തിയാകുന്നത്. പതിനയ്യായിരത്തോളം ശിഷ്യരാണ് ഈ ദർസുകളിൽ ഇതിനകം സ്ഥിരമായി പങ്കെടുത്തത്. ശിഷ്യത്വം ആഗ്രഹിച്ചും അനുഗ്രഹം തേടിയും പങ്കെടുത്തവർ അനേകമാണ്. കേരളത്തിലെ വിവിധ മതവിദ്യാഭ്യാസ കേന്ദ്രങ്ങളിലെ ഉന്നത പഠനം ആരംഭിക്കുന്ന വിദ്യാർഥികളും ബിരുദം സ്വീകരിച്ച് പുറത്തിറങ്ങാനിരിക്കുന്നവരും അനുഗ്രഹം തേടി സുൽത്വാനുൽ ഉലമയുടെ സ്വഹീഹുൽ ബുഖാരി ദർസിൽ കണ്ണിചേരാൻ എത്തുന്നത് സാധാരണയാണ്. വിശ്രുത ഹദീസ് പണ്ഡിതരായ ശൈഖ് മുഹമ്മദ് യാസീൻ അൽ ഫാദാനി ഉൾപ്പെടെയുള്ള ലോകപ്രശസ്ത പണ്ഡിതരുടെ ശിഷ്യത്വവും ഇജാസത്തുകളും ഇതിനകം ഉസ്താദ് കരസ്ഥമാക്കി. 

മസ്ജിദുൽ ഹറം, മസ്ജിദുൽ അഖ്‌സ, ഇമാം ബുഖാരിയുടെ അന്ത്യവിശ്രമ കേന്ദ്രം തുടങ്ങി ചരിത്രപ്രാധാന്യമുള്ള വിവിധ കേന്ദ്രങ്ങളിലും ഉസ്താദ് ദർസ് നടത്താനായെന്ന സൗഭാഗ്യവും ഉസ്താദിനെ തേടിയെത്തി. ഉസ്താദിന്റെ ബുഖാരി സേവനങ്ങൾ കൂടി കണക്കിലെടുത്താണ് 2023 ൽ മതപണ്ഡിതർക്കുള്ള മലേഷ്യൻ സർക്കാരിന്റെ പരമോന്നത ബഹുമതിയായ മഅൽ ഹിജ്‌റ പുരസ്‌കാരം ലഭിച്ചത്. ആ വർഷം മുതൽ മലേഷ്യൻ സർക്കാരിന്റെ ആഭിമുഖ്യത്തിൽ സംഘടിപ്പിച്ച അന്താരാഷ്ട്ര സ്വഹീഹുൽ ബുഖാരി വാർഷിക പാരായണ സംഗമത്തിന്റെ നേതൃത്വം നൽകാൻ സർക്കാർ അതിഥിയായി ക്ഷണിക്കപ്പെടുന്നതും അധ്യാപന രംഗത്തെ സുൽത്വാനുൽ ഉലമയുടെ പാരമ്പര്യം കണക്കിലെടുത്താണ്. ബുഖാരി അധ്യാപന കാലത്തെ ഗവേഷണവും വിശകലനവും ഉൾപ്പെടുത്തി തദ്കീറുൽ ഖാരി എന്ന വ്യാഖ്യാന ഗ്രന്ഥത്തിന്റെ പത്തു വാള്യങ്ങളുടെ രചനയും ഇതിനകം ഉസ്താദ് പൂർത്തീകരിച്ചു.