കോഴിക്കോട്: യുദ്ധക്കെടുതിയിലും പട്ടിണിയിലും പൊറുതിമുട്ടുന്ന ഗസ്സയിലെ മനുഷ്യരുടെ രക്ഷക്കും സമാധാനത്തിനും വേണ്ടി നാളെ(തിങ്കൾ) പ്രത്യേക പ്രാർഥന നടത്തണമെന്ന് ആഹ്വാഹം ചെയ്ത് ഇന്ത്യൻ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാർ. ഓരോ നിമിഷവും വിശപ്പിന്റെ മരണവേദനയിൽ നിലവിളിക്കുന്ന ഗസ്സയിലെ കുഞ്ഞുങ്ങളുടെ ചിത്രങ്ങൾ കണ്ണിൽ നിന്നു മായുന്നില്ലെന്നും ഒരിക്കലും നീതീകരിക്കാനാവാത്ത വംശഹത്യയാണ് ഇസ്രായേൽ നടത്തുന്നതെന്നും അദ്ദേഹം പറഞ്ഞു.  

പിറന്ന മണ്ണിൽ അഭയാർഥികളായി അരവയറുപോലും നിറക്കാൻ നിവൃത്തിയില്ലാതെ ദയനീയമായി നമ്മെ നോക്കുന്ന ഗസ്സക്കാരോട് മാനുഷിക കടമ നമുക്ക് വേണം.  അവർക്കുവേണ്ടി ഇനിയും സ്രഷ്ടാവിനോട് മനമുരുകി പ്രാർഥിക്കേണ്ടതുണ്ട്.  ഗസ്സ നിവാസികളുടെ ക്ഷേമത്തിനും സമാധാനം പുലരുന്നതിനും വേണ്ടി വരുന്ന നാളെ (തിങ്കൾ) പകൽ സുന്നത്ത് നോമ്പ് അനുഷ്ഠിക്കണമെന്നും മഗ്‌രിബ് നിസ്കാരശേഷം കുടുംബസമേതം ഒന്നിച്ചിരുന്ന് പ്രത്യേക പ്രാർഥന നടത്തണമെന്നും ഗ്രാൻഡ് മുഫ്തി അഭ്യർഥിച്ചു.

സർവവും നഷ്ടപ്പെട്ട് അഭയാർഥി ക്യാമ്പുകളിൽ കഴിയുന്നവർക്കും, മുഴുപട്ടിണിയിൽ സന്നദ്ധ സംഘടനകൾ വിതരണം ചെയ്യുന്ന കേവല ഭക്ഷണപ്പൊതികൾക്ക് കാത്തുനിൽക്കുന്നവർക്കും നേരെപോലും വെടിയുതിർക്കാൻ മുതിരുന്നത് എത്ര കിരാതമായ ആശയമാണ് അക്രമികളെ നയിക്കുന്നതെന്ന് ലോകത്തെ ബോധ്യപ്പെടുത്തുന്നുണ്ട്. 81% ജനങ്ങൾക്കും ഭക്ഷ്യോപയോഗം ഏറ്റവും കുറഞ്ഞ നിലയിലെന്നാണ് യുഎൻ കണക്കെന്നും പത്തിൽ ഒൻപതു കുടുംബങ്ങളും ഒരു നേരത്തെ ഭക്ഷണമെങ്കിലും കിട്ടാനായി നെട്ടോട്ടമോടുകയാണെന്നും കാന്തപുരം പ്രസ്താവനയിൽ പറഞ്ഞു.